Noreg er blitt eit sløvt, tilbakeskuande og på grensa til industrifiendtleg samfunn. Det skreiv nyleg Hanne Markussen Eek, konsernsjef i Franzefoss Minerals i ein kronikk i Finansavisen.
Utgangspunktet for kronikken er at Noreg står midt i ei tid der tilgang på kritiske mineral og strategiske råvarer blir stadig viktigare for både industri, forsvar og grønt skifte.
I denne debatten har Hanne Markussen Eek vore ei tydeleg og kunnskapsrik stemme. Ho deltek på Mineralkonferansen i april, der ho deler sine industrielle perspektiv. Ho utfordrar både politikarar og samfunn på kva som står på spel dersom Noreg ikkje tek mineralpolitikken på alvor.
Oppsummering av kronikken Landet som ble for slapt
I kronikken teiknar Hanne Markussen Eek eit bilete av eit Noreg som har mista både handlekraft og vilje til å utnytte dei naturlege fortrinna landet sit på. Ho stiller eit skarpt spørsmål om kvifor vi reagerer sterkt på politisk forfall i andre land, men ikkje på at norske styresmakter svekker vår eiga evne til å sikre framtidig verdiskaping og industriutvikling. Ho kombinerer dette med geopolitikk og industrihistorie og kjem med ei tydeleg åtvaring.
Strategisk val
Eek minner om at norsk velferd er bygd på strategiske val om å ta i bruk ressursar som vasskraft, fisk, olje og gass. Ho peikar på at dagens situasjon liknar på det å «ha vinnerloddet i Eurojackpot, men ikke gidde å cashe inn gevinsten». Med dette understrekar ho at Noreg sit på store moglegheiter, men manglar vilje til å gripe dei.
Fensfeltet
Eit av dei mest sentrale døma hennar er Fensfeltet i Telemark, som inneheld Europas største førekomst av sjeldne jordartar. Eek omtalar dette som eit geopolitisk kinderegg og minner om at verda ropar etter slike mineral, særleg innan forsvar, teknologi og grøn industri. Likevel opplever næringa at politisk interesse er låg, og at prosessane for å etablere mineraluttak har blitt «rene Kafka-prosesser» med uendelege omkampar og manglande føreseielegheit.
Politisk risiko hindrar investeringar
Ho løftar òg fram at Noreg ligg heilt i botn internasjonalt når det gjeld tilgang på risikokapital, og at politisk risiko gjer det lite attraktivt å investere i norsk mineralindustri. Dette meiner ho er dramatisk for ei næring som krev store og langsiktige investeringar.
Eek peikar vidare på korleis Kina har forstått den strategiske verdien av å kontrollere råvaretilgangen, og åtvarar om at Noreg risikerer å bli ståande på sidelinja i ein global kamp om kritiske ressursar. Ho oppmodar sterkt norske styresmakter til å vakne frå det ho omtalar som «den politiske lammelsen som har hjemsøkt vårt land».
Kvifor dette er relevant for Mineralkonferansen
Perspektiva til Hanne Markussen Eek er høgst relevante for årets Mineralkonferanse. Ho set ord på både moglegheitene og barrierane som pregar norsk mineralpolitikk, og løftar fram kor avgjerande det er at Noreg tek ein meir aktiv posisjon i møte med global konkurranse og geopolitisk uro.
Les kronikken i Finansavisen
Heile kronikken Landet som ble for slapt kan lesast her: Finansavisen: https://www.finansavisen.no/politikk/2025/12/26/8316298/landet-som-ble-for-slapt